فكرة القسم

موضوع: فكرة القسم الأربعاء مايو 21, 2008 7:00 am

حبيبتى منى

حبيت أعمل فكرة جديدة نكسر بيها أى حاجز موجود ونعالج من خلالها حجات كتير ، علشان كده فكرت فى قسم (قول اللى فى نفسك).

أوضح أكتر

عارفة يامنى.. طول عمرى بتمنى أرتبط بإنسانة تفهمنى وأكون أنا وهى واحد مفيش حاجة تفرق بينا أبدا ؛ عشان كده لازم نكون صرحا مع بعض مهما كانت الأسباب.

كل اللى بحاول أوصلهولك يامنى إن لو فى أى حاجة زعلتك منى متشتكيش لأى حد فى الدنيا دى غيرى ، أنا يامنى اللى هجبلك حقك حتى من نفسى ، جربى يامنى خليكى دايما أقرب الناس ليا وخلينى أقرب الناس ليكى وشوفى أنا هعمل إيه عشان أسعدك دايما ، صدقينى يامنى إحنا ملناش غير بعض فى النهاية والمفروض إننا هنبدأ مشوار كبير فى حياتنا.. مشوار مشترك كله مسؤلية وكفاح وأتمنى يكون كله حب ، والحب عمره مايستمر من غير مايكون فى صدق عشان كده أنا مش عايزك تخبى عنى أى حاجة يامنى.. لو فى حاجة زعلتك منى قوليهالى على طول وأوعى تترددى ، وأنا كمان لا يمكن هخبى عنك حاجة ولو زعلت منك فى حاجة أول إنسان هروح وأترمى فى حضنه وأشكيله همى هو إنتى يامنى.. إنتى يامنى مش حد تانى.

ياريت تكونى فهمتى وجهة نظرى وتعرفى إن أنا وإنتى واحد ، ملناش غير بعض ، وإن حياتنا هتكون مبنية على المبدأ ده إن شاء الله.. مشاكلنا نحلها بنفسنا مندخلش حد بينا أبدا وأنا بدورى هحاول أعمل كل اللى يسعدك إن شاء الله.

نرجع لموضوع القسم... فكرته باختصار يامنى اللى زعلان من التانى فى حاجة ومحرج يواجهه بيها يقولهاله هنا وأنا هدخل المنتدى من وقت للتانى عشان أقرا إنتى كتبتيلى إيه أو أكتبلك حاجة جديدة حسيتها من قلبى.

فكرة المنتدى جديدة يامنى مفيش إتنين بيحبوا بعض عملوها قبلنا ، عشان تعرفى بس نحن نختلف عن الأخرون (^_^)

على فكرة ياحبى المنتدى ده محدش يعرفه غير أنا وإنتى وبس يعنى كلمينى من قلبك ومتقلقيش أنا بس اللى هسمعه ، مممم تقدرى كده تقولى إن فكرة المنتدى هى جوابات العصر الحديث يعنى أنا وإنتى روميو وجوليت 2008 ^^

أخر حاجة عايز أقولهالك يامنى ربنا يارب مايجبش مشاكل أبدا ونفضل بعيد عن القسم ده

والسلام ختام